کراچی (رم نیوز)فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) اور کراچی چیمبر آف کامرس اینڈ انڈسٹری (کے سی سی آئی) نے 19 جولائی کو شیڈول ملک گیر شٹر ڈاؤن ہڑتال کے فیصلے کو منسوخ نہ کرنے کا اعلان کیا ہے۔ایف پی سی سی آئی کے سینئر نائب صدر، ثاقب نثار نے کہا کہ تاجر برادری سے مشاورت کا عمل جاری ہے اور آج اس بات کا فیصلہ کیا جائے گا کہ ہڑتال کے اگلے لائحہ عمل میں کوئی تبدیلی کی جائے یا نہیں، تاہم فی الحال ہڑتال کا فیصلہ برقرار ہے۔

کراچی چیمبر آف کامرس کے صدر، محمد جاوید بلوانی نے افواہوں کو مسترد کرتے ہوئے کہا کہ 19 جولائی بروز ہفتہ ملک گیر ہڑتال شیڈول کے مطابق ہوگی۔ جاوید بلوانی نے ہڑتال کی تیاریوں کے حوالے سے کہا کہ یہ فیصلہ چاروں صوبوں کے بڑے چیمبرز سے مشاورت کے بعد کیا گیا اور اگر ہڑتال مؤخر کرنے کا فیصلہ کیا گیا تو وہ بھی تمام چیمبرز سے مشاورت کے بعد ہی کیا جائے گا۔ انہوں نے ان افراد کی شدید تنقید کی جو ہڑتال کے حوالے سے افواہیں پھیلانے میں ملوث ہیں۔

یہ ہڑتال حالیہ ٹیکس اصلاحات اور تاجر برادری کو درپیش دیگر مسائل کے خلاف کی جا رہی ہے، جس میں تاجروں کی بڑی تعداد کی حمایت حاصل ہے۔