کراچی (رم نیوز)وفاقی اینٹی کرپشن عدالت نے چیئرمین سینیٹ اور سابق وزیراعظم یوسف رضا گیلانی کو ٹڈاپ میگا کرپشن سکینڈل کے تمام مقدمات سے بری کر دیا۔

عدالت میں آج سماعت کے دوران 14 مقدمات کا فیصلہ سنایا گیا، جس میں عدالت نے ریمارکس دیے کہ شواہد کے مطابق گیلانی کے ذاتی اکاؤنٹس میں کسی بھی قسم کی رقوم کی منتقلی ثابت نہیں ہو سکی۔ عدالت نے مزید کہا کہ "وعدہ معاف گواہ کو بعد میں خود ملزم بنا دیا گیا، جبکہ کئی مقدمات کا ریکارڈ ہائیکورٹ میں موجود ہے۔

یوسف رضا گیلانی پر ایف آئی اے نے ٹریڈ ڈویلپمنٹ اتھارٹی آف پاکستان (ٹڈاپ) کرپشن اسکینڈل میں مجموعی طور پر 26 مقدمات قائم کیے تھے۔ وہ اس سے قبل 12 مقدمات میں بری ہو چکے تھے، اور اب باقی 14 مقدمات سے بھی بری قرار پائے ہیں۔

یاد رہے کہ اس کرپشن اسکینڈل کی تحقیقات کا آغاز 2009 میں ہوا تھا، جب کہ ایف آئی اے نے 2013 میں مقدمات کا اندراج کیا اور 2015 میں یوسف رضا گیلانی کو بطور ملزم چالان میں شامل کیا گیا تھا۔