پشاور(رم نیوز)خیبرپختونخوا حکومت نے صوبے میں بگڑتی ہوئی امن و امان کی صورتحال کے پیش نظر اگلے ہفتے آل پارٹیز کانفرنس (اے پی سی) بلانے کا فیصلہ کیا ہے۔ اس کانفرنس میں تمام سیاسی جماعتوں کے نمائندوں کو مشاورت کے لیے مدعو کیا جائے گا تاکہ امن قائم رکھنے کے لیے مشترکہ حکمت عملی تیار کی جا سکے۔

یہ اعلان وزیراعلیٰ خیبرپختونخوا، علی امین گنڈاپور کی زیرصدارت منعقدہ صوبائی کابینہ کے 35 ویں اجلاس میں کیا گیا، جس میں صوبائی وزراء اور متعلقہ سیکرٹریز نے شرکت کی۔وزیراعلیٰ نے کہا کہ ضلع کرم میں جرگوں اور مقامی عمائدین کی مشاورت سے امن کی صورتحال بہتر ہوئی ہے، اور دیگر علاقوں میں بھی اسی ماڈل پر امن قائم کیا جا سکتا ہے۔

کابینہ نے 3 ایم پی او قانون میں اصلاحات کی منظوری دی ہے۔ اب اس قانون کا نفاذ محکمہ داخلہ کی پیشگی اجازت کے بغیر نہیں کیا جا سکے گا تاکہ اس کے غلط استعمال کو روکا جا سکے۔ وزیراعلیٰ نے بتایا کہ 3 ایم پی او قانون ایف سی آر طرز کا ہے، جس میں بہت سے مسائل پائے جاتے ہیں جن کی اصلاح ضروری ہے۔

اجلاس میں بھارتی جارحیت میں شہید ہونے والے خیبرپختونخوا کے شہداء کے لواحقین کو فی کس 50 لاکھ روپے معاوضے کی منظوری دی گئی مولانا خانزیب، جو دہشتگردی کے واقعے میں شہید ہوئے، کے ورثاء کے لیے ایک کروڑ روپے امداد کی منظوری دی گئی ہے۔

وزیراعلیٰ نے کہا کہ قدرتی آفات پر سیاست نہیں ہونی چاہیے اور خیبرپختونخوا حکومت دیگر صوبوں کی مدد کے لیے ہر وقت تیار ہے۔