اسلام آباد(رم نیوز)بانی پاکستان تحریک انصاف (پی ٹی آئی) نے ججز کے تبادلے اور سینیارٹی سے متعلق سپریم کورٹ کے فیصلے کو چیلنج کرتے ہوئے انٹرا کورٹ اپیل دائر کر دی ہے، جس میں عدالت عظمیٰ کے تین دو کے فیصلے کو کالعدم قرار دینے کی استدعا کی گئی ہے۔

سپریم کورٹ میں دائر اپیل میں مؤقف اختیار کیا گیا ہے کہ اسلام آباد ہائی کورٹ کے بعض ججز کی منتقلی عدلیہ کی آزادی پر حملہ ہے، اور اس کا مقصد غیر جانبدار ججز کو ہدف بنانا ہے۔ درخواست میں کہا گیا کہ ان ججز نے مبینہ مداخلت کے خلاف اعلیٰ حکام کو خطوط لکھے، مگر ان شکایات پر کارروائی کے بجائے ان کی سینیارٹی کو متاثر کیا گیا۔

اپیل میں آئین کے آرٹیکل 200 کا حوالہ دیتے ہوئے کہا گیا ہے کہ ججز کی منتقلی صرف عارضی ہو سکتی ہے، مستقل تبادلہ آئین کی صریح خلاف ورزی ہے۔ درخواست گزار کا مؤقف ہے کہ صدر مملکت کو ججز کی سینیارٹی یا تبادلے کے فیصلوں کا اختیار نہیں، جبکہ اس عمل میں آئین کے آرٹیکل 175-A کی بھی خلاف ورزی کی گئی ہے۔