پشاور (رم نیوز)وزیراعلیٰ خیبر پختونخوا علی امین گنڈاپور نے مخصوص نشستوں پر ارکان اسمبلی کی گورنر ہاؤس میں حلف برداری کو آئینی خلاف ورزی قرار دیتے ہوئے پشاور ہائی کورٹ میں چیلنج کر دیا ہے۔درخواست میں وفاقی حکومت، رجسٹرار پشاور ہائی کورٹ، گورنر، الیکشن کمیشن اور دیگر کو فریق بنایا گیا ہے۔ درخواست میں موقف اختیار کیا گیا ہے کہ اسپیکر صوبائی اسمبلی نے ارکان سے حلف لینے سے انکار نہیں کیا بلکہ اسمبلی اجلاس کی ملتوی کرنے کے باعث گورنر ہاؤس میں حلف لینا آئین کی خلاف ورزی ہے۔

درخواست میں کہا گیا ہے کہ آئین کے آرٹیکل 65 کے تحت ارکان اسمبلی سے حلف ہاؤس میں لینا لازمی ہے، جبکہ آرٹیکل 255(2) میں "ناقابل عمل" صورتحال کا تذکرہ ہے جسے انتظامی طور پر حل کرنا سپیکر کا کام ہے، چیف جسٹس کا نہیں۔

وزیراعلیٰ اور اسپیکر نے موقف دیا ہے کہ اگر وہ حلف برداری سے انکار کریں تو چیف جسٹس کسی کو حلف کے لیے نامزد کر سکتے ہیں، تاہم انہیں سننے کا موقع نہیں دیا گیا اور چیف جسٹس نے گورنر کو حلف برداری کے لیے نامزد کیا۔

واضح رہے کہ وزیراعلیٰ نے الیکشن کمیشن کی ہدایات کے تحت اسمبلی اجلاس طلب کیا تھا۔