گلگت بلتستان (رم نیوز)گلگت بلتستان کے ماحولیاتی نمونوں میں وائلڈ پولیو وائرس ٹائپ 1 کی تصدیق کے بعد انسداد پولیو مہمات تیز کر دی گئی ہیں۔نیشنل انسٹی ٹیوٹ آف ہیلتھ کی ریجنل ریفرنس لیبارٹری برائے پولیو کے مطابق ضلع دیامر سے حاصل کردہ سیوریج نمونوں میں پولیو وائرس کی موجودگی ثابت ہوئی ہے۔

اس انکشاف کے بعد 14 سے 18 جولائی کے دوران دیامر اور خیبرپختونخوا کے ملحقہ اضلاع میں خصوصی انسداد پولیو مہم چلائی گئی، جس میں 1,59,525 بچوں کو پولیو کے قطرے پلائے گئے۔سرکاری ذرائع کا کہنا ہے کہ پولیو پروگرام سخت ویکسی نیشن شیڈول کے تحت بچوں کو پولیو وائرس سے بچانے اور وائرس کے پھیلاؤ کو روکنے کے لیے بھرپور اقدامات کر رہا ہے۔

مزید حفاظتی مہمات آئندہ ہفتوں میں جاری رہیں گی، جن میں 21 سے 25 جولائی تک خیبرپختونخوا اور بلوچستان کے سرحدی علاقوں میں خصوصی انسداد پولیو مہم کا انعقاد کیا جائے گا تاکہ اسے افغانستان کی ذیلی قومی پولیو مہم کے ساتھ ہم آہنگ کیا جا سکے۔