لاہور (رم نیوز)سپیشل سینٹرل عدالت لاہور نے سابق وزیراعلیٰ پنجاب چودھری پرویز الہٰی کے خلاف منی لانڈرنگ کیس میں تحریری حکم جاری کر دیا ہے اور سماعت 18 اگست تک ملتوی کر دی ہے۔عدالت کے جج محمد عارف خان نیازی نے اپنے دو صفحات پر مشتمل تحریری حکم میں بتایا کہ ایف آئی اے نے عدالت کو آگاہ کیا ہے کہ پرویز الہٰی کے تفتیشی افسر کو کسی دوسری انکوائری کے سلسلے میں معطل کر دیا گیا ہے۔ اسسٹنٹ ڈائریکٹر ایف آئی اے نے یقین دہانی کرائی ہے کہ چالان کمیٹی کی منظوری کے بعد چالان عدالت میں جمع کروا دیا جائے گا۔

عدالت نے عبوری حکم دیتے ہوئے ہدایت کی ہے کہ آئندہ سماعت تک چالان ہر صورت عدالت میں پیش کیا جائے۔پرویز الہٰی کی حاضری معافی پر شکایت کنندہ کے وکیل نے اعتراض کیا کہ یہ تاخیری حربے ہیں اور عدالت کو بتایا کہ گزشتہ سماعت پر بھی اسی نوعیت کی میڈیکل رپورٹ پیش کی گئی تھی، جس میں دس روز کا بیڈ ریسٹ تجویز کیا گیا تھا، اور آج بھی اسی قسم کی میڈیکل رپورٹ پیش کی گئی۔

شکایت کنندہ نے کیس کی سماعت میں تاخیر پر افسوس کا اظہار کیا۔عدالت نے اعتراضات کے باوجود سابق وزیراعلیٰ کی ایک روزہ حاضری معافی منظور کی اور کیس کی مزید سماعت 18 اگست تک ملتوی کر دی۔