لاہور (رم نیوز)انسداد دہشت گردی کی عدالت لاہور نے 9 مئی کے جلاؤ گھیراؤ کیس کا فیصلہ سنا دیا، جس کے تحت پاکستان تحریک انصاف کی رہنما ڈاکٹر یاسمین راشد سمیت 8 ملزمان کو 10،10 سال قید کی سزا سنائی گئی، جبکہ سابق وزیر خارجہ شاہ محمود قریشی سمیت 6 افراد کو مقدمے سے بری کر دیا گیا۔

انسداد دہشت گردی عدالت کے جج ارشد جاوید نے کوٹ لکھپت جیل میں مقدمے کی سماعت مکمل ہونے کے بعد تھانہ سرور روڈ کے مقدمہ نمبر 97/23 کا محفوظ فیصلہ سنایا۔ مقدمے کی کارروائی جیل میں قائم خصوصی عدالت میں کی گئی۔

عدالت نے جن افراد کو سزا سنائی ان میں ڈاکٹر یاسمین راشد، سابق گورنر پنجاب عمر سرفراز چیمہ، سینیٹر اعجاز چودھری، میاں محمود الرشید، خالد قیوم، ریاض حسین، علی حسن اور افضال عظیم پاہٹ شامل ہیں۔دوسری جانب، عدالت نے شاہ محمود قریشی، زباس مان، افتخار احمد، رانا تنویر، حمزہ عظیم پاہٹ اور اعزاز رفیق کو بری کر دیا۔

پراسیکیوشن کی جانب سے کیس میں 61 گواہان کی شہادتیں پیش کی گئیں، جبکہ سرکاری وکیل عبدالجبار ڈوگر نے دلائل مکمل کیے۔ ٹرائل روزانہ کی بنیاد پر سپریم کورٹ کی ہدایت کے مطابق مکمل کیا گیا۔