پشاور (رم نیوز)پاکستان تحریکِ انصاف (پی ٹی آئی) نے ملک گیر احتجاجی حکمتِ عملی پر غور کے لیے 31 جولائی کو پشاور میں مرکزی قیادت کا اہم اجلاس طلب کر لیا ہے۔پارٹی ذرائع کے مطابق اجلاس کی صدارت چیئرمین پی ٹی آئی کریں گے، جبکہ سیکرٹری جنرل اور دیگر مرکزی رہنما بھی شریک ہوں گے۔ اجلاس میں آئندہ احتجاجی لائحہ عمل کے مختلف پہلوؤں پر تفصیلی مشاورت کی جائے گی۔

ذرائع کا کہنا ہے کہ اجلاس میں دو اہم تجاویز زیر غور آئیں گی ،اسلام آباد کی جانب احتجاجی مارچ، صوبائی سطح پر احتجاجی مظاہرے۔

پارٹی قیادت ان دونوں آپشنز کے فوائد اور نقصانات کا جائزہ لے گی، جبکہ دیگر ممکنہ احتجاجی طریقوں پر بھی غور کیا جائے گا۔ذرائع کا کہنا ہے کہ پارٹی کے متعدد رہنما دوبارہ اسلام آباد مارچ کے حق میں نہیں، اور متبادل حکمت عملی اختیار کرنے کے خواہاں ہیں۔قومی اسمبلی میں قائد حزبِ اختلاف عمر ایوب نے تصدیق کی ہے کہ احتجاج سے متعلق تمام امور کو 31 جولائی کو ہونے والے اجلاس میں حتمی شکل دے دی جائے گی۔