پشاور (رم نیوز)خیبر پختونخوا سے سینیٹ کی نشست پر ضمنی انتخاب کل ہوگا۔ یہ نشست پی ٹی آئی کی سابق سینیٹر ڈاکٹر ثانیہ نشتر کے استعفے کے بعد خالی ہوئی تھی۔انتخاب سے قبل سیاسی صف بندی میں بڑی تبدیلی سامنے آئی ہے، جہاں پاکستان پیپلز پارٹی کی امیدوار راحیلہ بی بی نے مسلم لیگ (ن) کی امیدوار کے حق میں انتخابی دوڑ سے دستبرداری کا اعلان کر دیا ہے۔ راحیلہ بی بی نے ریٹرننگ آفیسر کو خط ارسال کر کے اپنی حمایت مسلم لیگ (ن) کو دینے کا فیصلہ کیا۔
صوبائی الیکشن کمیشن کے مطابق ضمنی انتخاب کے لیے خیبر پختونخوا اسمبلی کے جرگہ ہال کو پولنگ اسٹیشن قرار دیا گیا ہے۔ انتخاب خفیہ رائے شماری کے ذریعے ہوگا اور پولنگ اسٹیشن کے اندر موبائل فون لے جانے پر پابندی عائد کر دی گئی ہے۔
الیکشن کمیشن کے مطابق مجموعی طور پر 9 امیدوار اس نشست کے لیے میدان میں موجود ہیں۔ ضمنی انتخاب کا عمل مکمل سیکیورٹی اور انتخابی قواعد کے مطابق منعقد کیا جائے گا۔
