اسلام آباد(رم نیوز)انسداد دہشت گردی عدالت نے سابق صدر عارف علوی، وزیراعلیٰ خیبرپختونخوا علی امین گنڈاپور سمیت پاکستان تحریک انصاف (پی ٹی آئی) کے 50 رہنماؤں کے وارنٹِ گرفتاری جاری کر دیے ہیں۔یہ وارنٹ کراچی کمپنی تھانے میں 26 نومبر کے احتجاج کے دوران درج مقدمہ نمبر 1193 کی سماعت کے بعد جاری کیے گئے۔ عدالت نے 41 نئے وارنٹ جاری کیے جبکہ 9 وارنٹ پہلے ہی جاری تھے، جس کے نتیجے میں کل وارنٹ کی تعداد 50 ہو گئی ہے۔

وارنٹ میں عارف علوی، عبدالقیوم نیازی، شبلی فراز، فیصل جاوید، سلمان اکرم راجہ، رؤف حسن، مراد سعید، احمد نیازی، علی امین گنڈاپور، اسد قیصر، حماد اظہر، عاطف خان، شعیب شاہین، اعظم خان سواتی، عمر ایوب، صاحبزاہ حامد رضا، علیمہ خانم، شیخ وقاص اکرم، کنول شوزب، شاندانہ گلزار اور شیرافضل مروت سمیت دیگر شامل ہیں۔ انسداد دہشت گردی عدالت کے جج ابوالحسنات ذوالقرنین نے ملزمان کے پیش نہ ہونے پر وارنٹ جاری کیے اور فوری گرفتاری کا حکم دیا ہے۔

یاد رہے کہ راولپنڈی ڈویژن میں 24 اور 26 نومبر کے واقعات کے حوالے سے 32 مقدمات درج ہیں، جن میں بشریٰ بی بی کو بھی تھانہ ٹیکسلا میں 26 نومبر کانسٹیبل قتل کیس میں نامزد کیا گیا ہے۔