لندن/ڈبلن (رم نیوز)سمندری طوفان "فلورس" کے برطانیہ اور آئرلینڈ سے ٹکرانے کے بعد نظام زندگی متاثر ہے، کئی علاقوں میں پروازیں اور ٹرینیں منسوخ ہیں۔سکاٹ لینڈ بھر میں طوفانی الرٹ جاری کر دیا گیا ہے۔ گلاسگو سے جزائر جانے والی تمام پروازیں معطل جبکہ نیو کیسل کے شمال میں ٹرین سروس بند کر دی گئی ہے۔ سکاٹ لینڈ کے ساحلی علاقوں میں 144 کلومیٹر فی گھنٹہ تک کی تیز ہوائیں ریکارڈ کی گئی ہیں۔
برطانوی محکمہ موسمیات کے مطابق، متعدد علاقوں میں ییلو اور ایمبر الرٹس جاری ہیں۔ آئرلینڈ کے کئی علاقوں میں ہزاروں صارفین بجلی سے محروم ہو چکے ہیں، جبکہ 100 سے زائد گھروں کی بجلی منقطع ہو گئی۔دوسری جانب تائیوان کے جنوبی علاقوں میں شدید بارشوں اور لینڈ سلائیڈنگ سے تباہی مچ گئی۔ مختلف واقعات میں 4 افراد جاں بحق، 77 زخمی جبکہ 3 افراد لاپتہ ہو گئے۔ 5900 سے زائد افراد کو محفوظ مقامات پر منتقل کر دیا گیا ہے۔
گزشتہ ایک ہفتے کے دوران 2000 ملی میٹر سے زائد بارش ہوئی، جو سالانہ اوسط سے بھی زیادہ ہے۔ کئی پہاڑی علاقوں میں رابطہ سڑکیں تباہ ہو چکی ہیں جبکہ شہری بستیاں پانی میں گھر گئی ہیں۔