ہنزہ (رم نیوز)گلگت بلتستان کے ہنزہ میں گلیشیئرز کے تیزی سے پگھلنے کے باعث دریائے ہنزہ میں پانی کی سطح خطرناک حد تک بڑھ گئی ہے، جس سے مورخون اور گرچہ کے علاقے میں شاہراہ قراقرم شدید متاثر ہو کر مکمل بند ہوگئی ہے۔شاہراہ کی بندش سے پاکستان اور چین کے درمیان زمینی رابطہ معطل ہوگیا ہے۔ سڑک پر کسی بھی قسم کی آمدورفت روک دی گئی ہے اور مقامی باشندوں کو احتیاطی تدابیر اختیار کرنے کی ہدایات دی گئی ہیں۔وادی ہنزہ میں ندی نالوں میں طغیانی کے باعث قریبی آبادیاں خطرے میں ہیں۔ ضلعی انتظامیہ اور متعلقہ ادارے ممکنہ نقصانات سے بچاؤ کے لیے ہنگامی اقدامات کر رہے ہیں۔محکمہ موسمیات اور ڈیزاسٹر مینجمنٹ اتھارٹی نے آگاہ کیا ہے کہ گلیشیئرز کا پگھلاؤ جاری رہنے کی صورت میں مزید سیلاب کی صورتحال پیدا ہو سکتی ہے۔