اسلام آباد (رم نیوز)وزیراعلیٰ خیبرپختونخوا علی امین گنڈاپور نے پاکستان تحریک انصاف کے بانی عمران خان کے طبی معائنہ کے لیے اسلام آباد ہائیکورٹ میں درخواست دائر کر دی ہے۔درخواست میں پنجاب حکومت، آئی جی جیل خانہ جات، جیل ہسپتال اور شوکت خانم میموریل ہسپتال کو فریق بنایا گیا ہے۔ درخواست گزار کا کہنا ہے کہ 72 سالہ عمران خان کی صحت خراب ہو رہی ہے اور جیل میں قید کے دوران ان کا وزن کم ہو چکا ہے، جس کے باعث ان کا باقاعدہ طبی معائنہ اور ضروری ٹیسٹ لازمی ہیں۔

درخواست میں شوکت خانم ہسپتال کی طبی ٹیم کو ماہانہ معائنہ کرنے کی اجازت دینے کی استدعا کی گئی ہے۔ اس کے علاوہ، ڈاکٹر عاصم یوسف، ڈاکٹر فیصل سلطان اور ڈاکٹر ثمینہ نیازی کو عمران خان تک رسائی فراہم کرنے کا حکم دینے کی درخواست بھی کی گئی ہے تاکہ وہ ان کا معائنہ اور طبی ٹیسٹ کر سکیں۔درخواست میں یہ بھی کہا گیا ہے کہ طبی معائنہ اور ٹیسٹ رپورٹس کو عدالت میں جمع کروایا جائے اور عمران خان کی فیملی کو فراہم کیا جائے۔