راولپنڈی (رم نیوز)فیلڈ مارشل سید عاصم منیر کے دورہ امریکہ کے دوران پاکستان کے موقف کو عالمی سطح پر پذیرائی حاصل ہوئی اور بھارت کا دہشت گردانہ چہرہ ایک بار پھر بے نقاب ہوگیا۔سکیورٹی ذرائع نے بتایا کہ فیلڈ مارشل عاصم منیر کی کامیاب ملٹری ڈپلومیسی کے نتیجے میں امریکا نے فتنہ الہندوستان (بی ایل اے) اور مجید بریگیڈ کو دہشت گرد تنظیمیں قرار دیا، جو پاکستان کے موقف کی بین الاقوامی توثیق ہے۔

ذرائع کے مطابق بھارتی خفیہ ایجنسی ’را‘ نے فتنہ الہندوستان کے ساتھ براہِ راست روابط قائم کیے اور مالی امداد فراہم کی، جبکہ بھارت نے دہشت گردوں کو اپنے ملک میں علاج معالجے کی سہولیات بھی فراہم کیں۔سکیورٹی ذرائع نے کہا کہ بھارت کے سرکاری اور غیر سرکاری حلقوں نے فتنہ الہندوستان کی دہشت گرد کارروائیوں کو جائز ثابت کرنے کی بھرپور کوشش کی۔ مودی اور اجیت دوول نے بلوچستان میں اس تنظیم کے ساتھ اپنے روابط کا بھی اعتراف کیا، جب کہ کلبھوشن یادیو کی گرفتاری بھارت کی ریاستی سرپرستی میں دہشت گردی کا واضح ثبوت ہے۔

سکیورٹی ذرائع کا کہنا ہے کہ بھارت کے دہشت گردانہ عزائم نہ صرف خطے بلکہ عالمی امن کے لیے سنگین خطرہ ہیں۔