پشاور (رم نیوز)پشاور ہائیکورٹ نے سینیٹر اعظم سواتی کا نام ایگزٹ کنٹرول لسٹ (ای سی ایل) اور پاسپورٹ کنٹرول لسٹ (پی سی ایل) سے نکالنے کی درخواست منظور کرتے ہوئے کیس نمٹا دیا۔ عدالت کو بتایا گیا کہ ان کا نام اب کسی سٹاپ لسٹ میں شامل نہیں۔

کیس کی سماعت جسٹس سید ارشد علی اور جسٹس ڈاکٹر خورشید اقبال پر مشتمل ڈویژن بنچ نے کی۔ سماعت کے دوران اعظم سواتی کے وکیل علی عظیم آفریدی نے مؤقف اختیار کیا کہ ان کے مؤکل کو 13 اگست کو بیرون ملک جانا ہے، تاہم فہرست میں نام ہونے کے باعث انہیں روکا جا رہا ہے، حالانکہ عدالت پہلے ہی نام نکالنے کا حکم دے چکی ہے۔

اسسٹنٹ اٹارنی جنرل نے عدالت کو آگاہ کیا کہ اعظم سواتی کا نام اب کسی بھی فہرست میں شامل نہیں۔ ایف آئی اے کے نمائندے نے بھی عدالت کو یقین دہانی کرائی کہ انہیں بیرون ملک جانے سے نہیں روکا جائے گا۔عدالت نے تمام مؤقف سننے کے بعد اعظم سواتی کی درخواست نمٹا دی۔