راولپنڈی (رم نیوز)پاکستان کے چیف آف آرمی سٹاف فیلڈ مارشل سید عاصم منیر کو آذربائیجان کے اعلیٰ ترین پیٹریاٹک وار میڈل سے نوازا گیا ہے۔ یہ اعزاز انہیں فوجی تعاون کے شعبے میں ان کی غیرمعمولی خدمات کے اعتراف میں دیا گیا۔آئی ایس پی آر کے مطابق، فیلڈ مارشل عاصم منیر سے آذربائیجان کے نائب وزیر دفاع نے ملاقات کی، جس میں باہمی دلچسپی کے امور اور علاقائی سیکیورٹی کے مسائل پر تبادلہ خیال کیا گیا۔ دونوں رہنماؤں نے دفاعی تعاون کو مزید بڑھانے اور خطے میں امن و استحکام کے لیے مشترکہ کوششوں پر اتفاق کیا۔

ملاقات میں فیلڈ مارشل عاصم منیر نے آذربائیجان اور آرمینیا کے تنازع کے پُرامن حل کی ضرورت پر زور دیا۔ انہوں نے آذربائیجان کی یکجہتی اور یوم آزادی کی تقریب میں شرکت پر شکریہ بھی ادا کیا۔آذربائیجان کے نائب وزیر دفاع نے پاکستانی فوج کی پیشہ ورانہ صلاحیتوں کی تعریف کی اور آپریشن بنیان مرصوص کی کامیابی پر خراج تحسین پیش کیا۔

فیلڈ مارشل عاصم منیر کو یہ اعزاز آذربائیجان کے صدر الہام علیوف کی جانب سے دیا گیا، جس کا مقصد دہشت گردی کے خلاف پاکستان کی کوششوں کو سراہنا ہے۔ اس کے علاوہ، کرنل جنرل کریم نے بھی پاکستان کے دہشت گردی کے خلاف عزم کو سراہا۔