راولپنڈی(رم نیوز)فیلڈ مارشل سید عاصم منیر نے کہا ہے کہ پاک فوج روایتی، غیر روایتی اور ہائبرڈ خطرات سے نمٹنے کے لیے پوری طرح لیس ہے، آزادی اور خودمختاری پر کوئی سمجھوتہ نہیں کیا جائے گا اور ملکی سالمیت کو نقصان پہنچانے کی کسی بھی مہم جوئی کا فوری جواب دیا جائے گا۔

پاکستان کے 78ویں یومِ آزادی پر قوم کے نام خصوصی پیغام میں فیلڈ مارشل نے تمام اہلِ وطن کو مبارکباد دی اور برصغیر کے مسلمانوں سمیت وطن کی خاطر قربانیاں دینے والے بزرگوں کو خراجِ تحسین پیش کیا۔ انہوں نے کہا کہ پاکستان عالمِ اسلام کا مضبوط اور ناقابلِ تسخیر قلعہ ہے جو بین المذاہب ہم آہنگی اور مذہبی آزادی کی روشن مثال ہے، جہاں اقلیتیں آج بھی ملکی ترقی میں فعال کردار ادا کر رہی ہیں۔

فیلڈ مارشل نے کہا کہ دہشت گردی کے خاتمے کیلئے پاکستان نے بے پناہ جانی و مالی قربانیاں دی ہیں۔ پہلگام سانحے کا ذکر کرتے ہوئے انہوں نے کہا کہ پاکستان نے اس واقعے کی شدید مذمت اور شفاف عالمی تحقیقات کی پیشکش کی، تاہم بھارتی حکومت نے ہٹ دھرمی کا مظاہرہ کرتے ہوئے شہری آبادی کو نشانہ بنایا۔

ان کا کہنا تھا کہ قوم کی حمایت سے مسلح افواج نے بھارتی جارحیت کا منہ توڑ جواب آپریشن "بُنْيَانٌ مَّرْصُوْص" کے ذریعے دیا، جو پاک فوج کی بہادری اور جذبے کی روشن علامت ہے۔ فیلڈ مارشل نے کہا کہ پاکستان خطے میں امن و ترقی چاہتا ہے لیکن اپنی آزادی اور خودمختاری پر کسی صورت سمجھوتہ نہیں کرے گا۔

انہوں نے ایک بار پھر کشمیری عوام کی جدوجہد آزادی کی مکمل حمایت کا عزم دہراتے ہوئے کہا کہ حقِ خود ارادیت ہی مسئلہ کشمیر کا واحد پائیدار حل ہے۔ فیلڈ مارشل نے فلسطینی عوام کے ساتھ اظہارِ یکجہتی کرتے ہوئے عالمی برادری سے ان کے حقوق کے تحفظ کیلئے فوری اقدامات کا مطالبہ کیا۔

فیلڈ مارشل سید عاصم منیر نے جدوجہد آزادی کے تمام شہدا کو سلام پیش کرتے ہوئے کہا کہ ان کا حوصلہ اور ایمان سے لبریز عزم ہماری رہنمائی کا چراغ ہے۔ انہوں نے کہا کہ پاک فوج کی پیشہ ورانہ مہارت اور جنگی تیاری پر مکمل اعتماد ہے اور وطن کی سرحدوں کی حفاظت کیلئے کسی قربانی سے دریغ نہیں کیا جائے گا۔