کراچی(رم نیوز)کاؤنٹر ٹیررازم ڈیپارٹمنٹ (CTD) نے کراچی کو بڑی تباہی سے بچاتے ہوئے شاہ لطیف ٹاؤن میں کامیاب آپریشن کیا ہے۔ فائرنگ کے شدید تبادلے کے بعد "فتنۃ ہندوستان بشیر زیب نیٹ ورک" کے 4 دہشت گرد ہلاک جبکہ 2 پولیس اہلکار زخمی ہو گئے۔ آپریشن کی تفصیلات حکام کے مطابق سی ٹی ڈی نے پہلے سے گرفتار دہشت گردوں کی نشاندہی پر ایک مشتبہ مکان پر چھاپہ مارا، جہاں موجود دہشت گردوں نے پولیس پر اندھا دھند فائرنگ کر دی۔ جوابی کارروائی میں 4 دہشت گرد مارے گئے، جن کی شناخت جلیل عرف فرید، نیاز عرف کنگ اور حمدان کے ناموں سے ہوئی ہے، جبکہ ایک کی شناخت تاحال نہیں ہو سکی۔

تباہ کن مواد کی برآمدگی بم ڈسپوزل سکواڈ نے موقع پر پہنچ کر گھر کی تلاشی لی تو وہاں ڈرموں میں تیار کردہ آئی ڈیز (IEDs)، ڈیٹونیٹرز، ڈیٹونیٹک وائر اور سرکٹس برآمد ہوئے۔ دہشت گردوں کے قبضے سے کلاشنکوف اور ہینڈ گرنیڈ بھی ملے ہیں۔ ماہرین نے فوری طور پر بارودی مواد کو ناکارہ بنا کر شہر کو بڑے حادثے سے محفوظ کر لیا۔ مفرور ملزمان اور زخمی اہلکار ڈی آئی جی سی ٹی ڈی کے مطابق مقابلے کے دوران 2 سے 3 دہشت گرد فرار ہونے میں کامیاب رہے جن کی تلاش کے لیے سرچ آپریشن شروع کر دیا گیا ہے۔ دوسری جانب زخمی ہونے والے ہیڈ کانسٹیبل محمد یوسف اور سپاہی راجہ جنید کو فوری طبی امداد کے لیے ہسپتال منتقل کر دیا گیا ہے۔