ٹوکیو/ہانگ کانگ (رم نیوز) مشرقِ وسطیٰ میں بڑھتی ہوئی کشیدگی اور خام تیل کی قیمتوں میں اضافے کے باعث ایشیائی سٹاک مارکیٹس شدید دباؤ کا شکار ہیں۔ عالمی سرمایہ کاروں میں بے یقینی کی لہر کے باعث ایشیا کے بڑے تجارتی مراکز میں مسلسل تیسرے روز بھی مندی کا رجحان برقرار رہا۔ آج کی ٹریڈنگ کے دوران مختلف ممالک کے انڈیکسز میں نمایاں کمی دیکھی گئی۔ جنوبی کوریا کا کوسپی (KOSPI) انڈیکس سب سے زیادہ متاثر ہوا، جو ٹریڈنگ کے دوران 7% تک گرنے کے بعد فی الحال 6% کمی پر موجود ہے۔

جاپان کے نکیئی 225 انڈیکس کو بھی 3% کی بڑی گراوٹ کا سامنا ہے۔ آسٹریلیا کا ASX 200 اور ہانگ کانگ کا ہینگ سینگ انڈیکس بھی سرخ نشان (منفی زون) میں ٹریڈ کر رہے ہیں۔ معاشی ماہرین کے مطابق اسٹاک مارکیٹ میں اس گراوٹ کی بنیادی وجہ خام تیل کی قیمتوں میں ہونے والا حالیہ اضافہ ہے۔

صبح برینٹ اور امریکی خام تیل کی قیمتوں میں مزید 1.2% اضافہ ریکارڈ کیا گیا ہے۔ مشرقِ وسطیٰ میں نئے حملوں کے سلسلے کے باعث اہم بحری گزرگاہ آبنائے ہرمز کے قریب آئل ٹینکرز کی آمد و رفت رکی ہوئی ہے، جس نے عالمی سپلائی چین کے حوالے سے خدشات پیدا کر دیے ہیں۔